ਅਦਾਕਾਰਾ ਅਤੇ ਡਾਂਸਰ ਨੋਰਾ ਫਤੇਹੀ (Nora Fatehi) ਨੇ ਜੇਲ੍ਹ ਵਿੱਚ ਬੰਦ ਸੁਕੇਸ਼ ਚੰਦਰਸ਼ੇਖਰ ਨਾਲ ਜੁੜੇ ₹200 ਕਰੋੜ ਦੇ ਕਥਿਤ ਜਬਰਦਸਤੀ ਵਸੂਲੀ ਅਤੇ ਮਨੀ ਲਾਂਡਰਿੰਗ ਮਾਮਲੇ ਬਾਰੇ ਪਹਿਲੀ ਵਾਰ ਵਿਸਥਾਰ ਨਾਲ ਗੱਲ ਕੀਤੀ ਹੈ। ਨੋਰਾ ਨੇ ਕਿਹਾ ਕਿ ਇਸ ਵਿਵਾਦ ਵਿੱਚ ਉਸਦਾ ਨਾਮ ਆਉਣ ਤੋਂ ਬਾਅਦ ਉਸਦੀ ਨਿੱਜੀ ਅਤੇ ਪੇਸ਼ੇਵਰ ਜ਼ਿੰਦਗੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈ।
‘ਡ੍ਰੀਮ ਵਿਦ ਡਾ. ਸ਼ੀਨ’ ਪੋਡਕਾਸਟ ਵਿੱਚ ਗੱਲਬਾਤ ਦੌਰਾਨ ਨੋਰਾ ਨੇ ਕਿਹਾ ਕਿ ਜਦੋਂ ਉਸਦਾ ਨਾਮ ਇਸ ਮਾਮਲੇ ਨਾਲ ਜੋੜਿਆ ਗਿਆ ਤਾਂ ਉਹ ਬਹੁਤ ਹੈਰਾਨ ਹੋਈ ਸੀ। ਉਸ ਮੁਤਾਬਕ ਉਸਦੇ ਪਰਿਵਾਰ ਅਤੇ ਕਰੀਬੀ ਦੋਸਤ ਉਸਨੂੰ ਚੰਗੀ ਤਰ੍ਹਾਂ ਜਾਣਦੇ ਸਨ, ਪਰ ਆਮ ਲੋਕਾਂ ਵਿੱਚ ਉਸ ਬਾਰੇ ਕਈ ਤਰ੍ਹਾਂ ਦੀਆਂ ਗੱਲਾਂ ਫੈਲਣ ਲੱਗੀਆਂ।
ਨੋਰਾ ਨੇ ਦੱਸਿਆ ਕਿ ਇਸ ਵਿਵਾਦ ਦਾ ਉਸਦੇ ਕਰੀਅਰ ’ਤੇ ਵੀ ਅਸਰ ਪਿਆ। ਉਸਦੇ ਮੁਤਾਬਕ ਕਈ ਬ੍ਰਾਂਡ ਉਸ ਤੋਂ ਦੂਰ ਹੋ ਗਏ ਅਤੇ ਉਸਦੇ ਹੱਥੋਂ ਕਾਫ਼ੀ ਕੰਮ ਨਿਕਲ ਗਿਆ। ਉਸਨੇ ਕਿਹਾ ਕਿ ਅੱਜ ਵੀ ਕੁਝ ਲੋਕ ਇਹ ਦਾਅਵਾ ਕਰਦੇ ਹਨ ਕਿ ਉਹ ਸੁਕੇਸ਼ ਨੂੰ ਜਾਣਦੀ ਸੀ ਜਾਂ ਉਸਨੂੰ ਡੇਟ ਕਰਦੀ ਸੀ, ਪਰ ਨੋਰਾ ਨੇ ਇਨ੍ਹਾਂ ਦਾਅਵਿਆਂ ਨੂੰ ਗਲਤ ਦੱਸਿਆ।
ਤੋਹਫ਼ਿਆਂ ਬਾਰੇ ਕੀ ਕਿਹਾ?
ਨੋਰਾ ਨੇ ਮੰਨਿਆ ਕਿ ਉਹ ਇੱਕ ਸਮਾਗਮ ਵਿੱਚ ਸ਼ਾਮਲ ਹੋਈ ਸੀ ਅਤੇ ਉਸਦਾ ਸੁਕੇਸ਼ ਦੇ ਪਰਿਵਾਰ ਅਤੇ ਪਤਨੀ ਨਾਲ ਸੰਪਰਕ ਹੋਇਆ ਸੀ। ਉਸਨੇ ਇਹ ਵੀ ਕਿਹਾ ਕਿ ਉਸਨੂੰ ਇੱਕ ਕਾਰ ਅਤੇ ਕੁਝ ਹੋਰ ਚੀਜ਼ਾਂ ਤੋਹਫ਼ੇ ਵਜੋਂ ਦਿੱਤੀਆਂ ਗਈਆਂ ਸਨ। ਨੋਰਾ ਮੁਤਾਬਕ ਉਸ ਸਮੇਂ ਉਸਨੂੰ ਦੱਸਿਆ ਗਿਆ ਸੀ ਕਿ ਇਸ ਤਰ੍ਹਾਂ ਤੋਹਫ਼ੇ ਦੇਣਾ ਆਮ ਗੱਲ ਹੈ।
ਹਾਲਾਂਕਿ ਨੋਰਾ ਨੇ ਸਾਫ਼ ਕੀਤਾ ਕਿ ਸੁਕੇਸ਼ ਨਾਲ ਉਸਦਾ ਕੋਈ ਰੋਮਾਂਟਿਕ ਰਿਸ਼ਤਾ ਨਹੀਂ ਸੀ। ਉਸਨੇ ਕਿਹਾ ਕਿ ਉਸ ਬਾਰੇ ਇਹ ਕਹਿਣਾ ਕਿ ਉਹ ਸੁਕੇਸ਼ ਨੂੰ ਡੇਟ ਕਰਦੀ ਸੀ ਜਾਂ ਉਸ ਤੋਂ ਪੈਸੇ ਲੈਂਦੀ ਸੀ, ਸਹੀ ਨਹੀਂ ਹੈ।
ED ਦੀ ਪੁੱਛਗਿੱਛ ਦਾ ਦੌਰ ਦੱਸਿਆ ਮੁਸ਼ਕਲ
ਨੋਰਾ ਨੇ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਵੱਲੋਂ ਕੀਤੀ ਗਈ ਪੁੱਛਗਿੱਛ ਦੇ ਦੌਰ ਨੂੰ ਵੀ ਯਾਦ ਕੀਤਾ। ਉਸਨੇ ਕਿਹਾ ਕਿ ਲਗਭਗ ਦੋ ਸਾਲ ਉਸ ਲਈ ਬਹੁਤ ਮੁਸ਼ਕਲ ਰਹੇ। ਵਿਵਾਦ ਅਤੇ ਲਗਾਤਾਰ ਚੱਲ ਰਹੀਆਂ ਚਰਚਾਵਾਂ ਕਾਰਨ ਉਹ ਆਪਣੇ ਆਪ ਨੂੰ ਇਕੱਲਾ ਮਹਿਸੂਸ ਕਰਦੀ ਸੀ।
ਨੋਰਾ ਨੇ ਕਿਹਾ ਕਿ ਸਭ ਤੋਂ ਵੱਧ ਦੁੱਖ ਉਸਨੂੰ ਇਸ ਗੱਲ ਦਾ ਹੋਇਆ ਕਿ ਲੋਕਾਂ ਨੇ ਬਿਨਾਂ ਪੂਰੀ ਸੱਚਾਈ ਜਾਣੇ ਉਸਦੇ ਸੁਕੇਸ਼ ਨਾਲ ਸਬੰਧ ਹੋਣ ਦੀਆਂ ਗੱਲਾਂ ਮੰਨ ਲਈਆਂ। ਇਸ ਦੌਰ ਨੂੰ ਯਾਦ ਕਰਦਿਆਂ ਉਹ ਭਾਵੁਕ ਹੋ ਗਈ ਅਤੇ ਉਸ ਦੀਆਂ ਅੱਖਾਂ ਵਿੱਚ ਹੰਝੂ ਆ ਗਏ।
ਨੋਰਾ ਮੁਤਾਬਕ ਇਸ ਪੂਰੇ ਵਿਵਾਦ ਨੇ ਉਸਨੂੰ ਇਹ ਸਿਖਾਇਆ ਕਿ ਸੋਸ਼ਲ ਮੀਡੀਆ ’ਤੇ ਕਿਸੇ ਬਾਰੇ ਕੁਝ ਲਿਖਣ ਜਾਂ ਦਾਅਵਾ ਕਰਨ ਤੋਂ ਪਹਿਲਾਂ ਲੋਕਾਂ ਨੂੰ ਸੋਚਣਾ ਚਾਹੀਦਾ ਹੈ, ਕਿਉਂਕਿ ਗਲਤ ਜਾਣਕਾਰੀ ਕਿਸੇ ਵਿਅਕਤੀ ਦੀ ਨਿੱਜੀ ਜ਼ਿੰਦਗੀ ਅਤੇ ਕਰੀਅਰ ਦੋਵਾਂ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ।